Home / مضمون / شیداٞل اتروڑ، چُنڑیل: سلیم خانے اتروڑ

شیداٞل اتروڑ، چُنڑیل: سلیم خانے اتروڑ

اُچات اُچات کھٞن، پالے پالے زنگٞل، نیل نیل ڈینڑ تے اسوں میٞہ لُکوٹ شانہ اٞ دشت بچاٞل تھُو۔ آٞس کٞہ موں مشراٞنٞہ ازروٹاں نام دیت۔ مشراٞن قصہ کٞراں ارو اٞ چھاٹ اٞ میش گھور دہ وانۡش تے سٞہ دی اٞ میشہ ڈپو، تسوں جاٞر ہی، توم آک دی کٞہ روݭ مئی گاٞ۔ تتھیں دی میش گھور پلاٞن کٞہ ارو اتھو روڈ، مطلاٞب ایں نوں “روڈ دہ وو” تٞن تھی باٞد ایں علاقاں نام اتروڑ تھاجین۔

ایں لُکوٹ شاٞنہ علاقاٞ مئی باٞر رین رین خلکہ جوند لنگات۔ ایں قوم غیرت مند قوم۔ ایں لاٞم مئی چور سیزن آشاں اوں توم چوئی حصاٞ مئی تقسیم کٞراٞل تھُو۔ امی سیزن مئی ہمان، بسان، بریݭ تے شارئی تھُو۔

اتروڑاں بریݭاں موسم باٞر زیات سلوق آشاں، دنایاٞں کُوٹ کوُٹ تھی خلک اسیں سلیقیراں ساٞلہ یاں۔ اتروڑ مئی سات ڈینڑ تھی، تٞن مئی کنڈول، سپین خوڑ، خاپریانیں ڈانڑ تے خڑخڑئی ایں ڈانڑ باٞر مشہیر ڈینڑ تھی۔ کٞن اتروڑ رہ ساٞلہ اوکی کنڈولیں ڈینڑا چکٞر نہ دیت تن لخہ اٞ لین چئی پیگ۔ تساں ساٞلاں مزہ اوڑ درُو۔

اتروڑ مئی ہاٞر چھلاں تماں ماوا پیدا ہواں۔ تٞن مئی ڄھور، آݭیر، بوبئی، الوچاٞ تے املوک پا ہواں۔ اتروڑیں بوبئی پورہ سوات مئی باٞر زیات میڄ بوبئی۔

ایں چھلہ اتروڑ مئی صفا تے شیداٞل اُو آں باٞر اوڅ تھُو۔ تٞن مئی کِݭاٞن اُوڅ، چشمہ شفاء(شفاں اُوڅ) تے چٞکلیٹ اوڅ باٞر مشہور تھُو۔ اُو اللہ پاکاں نعمت پرہ چٞکلیٹ اُوڅاں مزہ لخہ شراباں تھُو۔ ایں اُوڅ ایں خاص اہمیات ایں نو ائی گرمی مئی باٞر شیداٞل تے شِدٞل مئی باٞر گٞرم آشاں۔ سٞہ اتروڑاں

مشہور گلشن آباد مئی موجود تھُو۔ مُباراک روز مئی باٞر دُور دُور تھی خلک اساں اُو پوگیں کِیر نیاں۔

اتروڑیں زنگِل مئی ہاٞر قسماں تٞم تھُو۔ تٞن مئی لو، چیر، چُکاٹ، راں تے دی قسماں تٞم پا تھُو۔ مِزیر منی اٞ تام باٞر مشہور تاٞس خلک تانی شیٹ شی ٹیل ݭاگیں کِیر باٞر استعمال کٞراں۔ مِزیراں تٞم تھی چاگیل ٹیلہ لخہ لوُو رانگ داٞگاٞل آشاں۔

ایں چھلہ اتروڑیں زنگِل مئی تھاکٞہ باٞر قسمیں بوٹی پا میلا ہوگ۔ تٞن مئی ماویک، اَڄ، دھوپ، کِیلار، بنہ آݭار، مگٞروس، جیلو جیل، ملاڄہ، متر جڑی، کاکھیں نار، کنڑیں نار، اُواول، ماراݭ، آسوس تے دی پا باٞر بوٹی تھی، اتروڑیں صفت رہ چُنڑوگ باس نہ کیر تے قلم مئی سیاہی ختم ہوگ اینیں کِیر اتیک رہ عمال کٞری۔

gawri one

یہ پروفائلبطور ایڈمن رائیٹس استعمال ہوتا ہے۔ اس یوزر کے تمام ارٹریکلز سائٹ ایڈمن کے شائع شدہ آرٹیکلز ہے۔
gawri one

کمنٹس

آپ کی رائے

Check Also

تٞم ما کٞہ پکٞار، چُنڑیل:محمد نبی آشورن، کالام

کٞہ ٹیمہ باٞر گٞریمی ہی تے مہ تٞمیں چھاۓ باتاں۔ چٞھیہ بییوگ دہ ماکٞہ آرام …

Leave a Reply

Your email address will not be published. Required fields are marked *