Home / لاڑاگاٞل قصاٞ / زنگاٞل لسینت غرباٞت سیوا ہوینت، اخترعلی جان

زنگاٞل لسینت غرباٞت سیوا ہوینت، اخترعلی جان

مشران ماں بجاں ارو موں کالمیں میدانی زنگال اتیک پیٹ آشی اوں ان شی انسان لنگوش تے سٞہ واپسی ایں پن نہ لا ݭار ہوانش۔ دیگیر اشپیرہ دیانش تھُکو تساں دی سیت یاٞ تاٞس کٞہ پن سیدہ کٞرنش۔ اتیک پِیٹ زنگاٞل آشیینش اوں ارو خلک اݭو رہ تے اتروڑ رہ گٞداٞ دہ سودہ نیانش تے ییش دوئی لویا میہ پھݭیجنش۔

ایں چھلہ مُٹو کاں شنپات تھو ائی تے شاہی گراؤنڈ پا پیٹ زنگاٞل آش۔ خلکہ رو رو لو تلُو تے جوکو تن تھی زنگاٞل ختم ہومین ئیگ۔ دِگیر ایماں پھر اوٹلونہ تے مارکیٹونہ چاجین خلک لو تلوݭات تے تساں شاک اوم کٞہ ݪیاروݭت۔ ایں چھلہ الات خلکہ آس ماں تھی کہ روزگار چاگ۔ دیگیر شاک واکہ گیچو پا ݪیاروݭت۔

حکومتہ اتوشی زور ݭیگ پرہ حکومتاں خلک پا ایں کاٞر مئی شریک ہو۔ څاق سٞہ مِلو۔ تٞن تھی باد زنگال تُو کاٹ کٞر تے یہ کاٹ کٞر۔ کوم ای تپوس نہ کروݭت۔ میڈیا رہ ایں مسلہ اُچات ہو تے حکومتہ اتوشی زور ݭیگ۔ زنگیلاں شاک بلاگ څاقیں کیر اتوشی بِکھار ہو۔ پرہ مُٹو پا باٞر علاقاٞ مئی غیر قانونی مشینان ݭجیل تھی۔ رات کٞہ لو کاٹ ہوانت۔ مہ نٹوکہ لماٹاں گراؤنڈ ایں پیݭ کٞہ بچاں، ہاٞر دوس لو اوڑہ چھیناٞل آشنت۔ امی خلک لو اُوٹ کٞہ چُنانت۔ دِگیر امی لو ششنت تے اوم آس ٹوپہ تلی گیچو سلیپر چانت یا ای ہمن کٞہ جالنت۔ پرہ حکومتیں پیݭ تھی بیخی خاموشی تھی۔ لخہ ایں حالات ہی تے مٞہ ایں دریل زنگِل ماں پا لساں۔ امی کاں چچ موں علاقاٞ رہ اُکانت اوم ایں شیداٞل اُو، ڈینڑ تے زنگیلیں کیر اوکانت۔ امی چچاں وجاٞ دہ موں روزگار چلنت۔ کالم مئی ݪی سو ماں سیوا اوٹلونہ چلنت۔ ریسٹورنٹ تھو، پارکونہ تھو، دُکانونہ تھو، ریڑھئی چلینت سویاں روزگار ایں چچ سہ گنڑال تھُو۔

لخہ ایں زنگاٞل لیس تے چچ نہ اکاں، بے روزگاری سیوا ہویں۔ غربات سیوا ہویں۔ غربات سیوا ہی تے مہ تانی لوکوٹراں تعلیم خرچہ پا برداشت نہ کٞرباں۔ حالات ایں چھلہ روان تھی۔ مٹو گشی غربات سیوا ہیت۔ لوکوٹور اسکولاں باٞ چو ورکشاپونہ تے اوٹلونہ مئی کار کٞرنت۔ حالات ایں چھلہ ہی تے غرباٞت اتیک سیوا ہوگ اوں امی خلک مجبور ہو تانی علاقہ پا چھیری دئیل مزدیری کٞرئی۔ ائی موں سوئیں قومی ذمہ ویری اوں تانی ایں زنگال بچ کٞری تے دی پا تم بوئی۔

 

اخترعلی جان

اخترعلی جان آں تعلق کالام آں بازار تھی تھُو۔ ائی زوان سماجی کارکن تے تعلیمیں کِیر کار کراں
اخترعلی جان

کمنٹس

آپ کی رائے

Check Also

اس مس ڈانڑ، چُنڑیل: محمد ارشاد راہی، گلبرگ، اتروڑ

اٞ دوس مٞہ بلاٞیاٞں ملگٞر مِلو تے مٞہ مشورہ کِیر ارو اِس مِس ایں ڈینڑ …

Leave a Reply

Your email address will not be published. Required fields are marked *