Home / لاڑاگاٞل قصاٞ / خوراک خراب ہوانت تے مرض سیوا ہوینت، چُنڑیل: الیاس جان

خوراک خراب ہوانت تے مرض سیوا ہوینت، چُنڑیل: الیاس جان

مُوں کھٞناں علاقا مئی امودا پالے سبزی، ڄھیر، ݭݭاٞل تے جویرآٹ رات آشنۡش۔ رو رو امی خوراکونہ ختم ہومین یاٞگ اوٹلونہ سیوا ہو۔ قسم قسماں مساٞلاٞ تے ڈالڈا دہ تڑکہ داٞگاٞل ٹوکٞن اوٹلونہ مئی شروع ہو۔ دیگیر خلک اوٹلوناں تیار خوراکہ ہیلو۔ تن تھی باد خلکہ تانی لارہ پا تتھی قذرتی خوراک چھیری مسالاں تے ڈالڈاں خوراک پاچاگ شروع کِیر۔

امی خوراکونہ صحتیں کِیر باٞر لاݪ آشاں۔ مُٹو کھنہ پشنت تے خلکاں میدا خراب تھُو تے قسماں قسمیں مرض مئی ڈوب تھُو۔

دی گاٞن جولاگ ایں نُو امودا خلک ݪمنۡش۔ کھیر مئی تانی فصال بونش، کھیرہ او داگیں کیر کانڑ گنڑنش۔ کانڑیں کیر سائمات ہوینش، اپینا شلہ کٞرنش، شلہ چُوناش مطلبیں بات ایں نو ہاٞرہ کار تانی تھیر دہ کٞرنش۔ تن د تسوں وردش ویۡنش۔ اینیں کیر خلک ٹکٞار آشنش۔ وردشاں وجا دہ مرض اسوں سیتہ پا کاش نہ ہوبینش۔ مٹو چھٹا تے زوان زوان پا بلڈپریشر، شوگر، میدیں مرض تے قسم قسمیں مرض سیوا ہیت۔

مشراٞن ماں تپوس کٞرا تھاکہ اپینا قصہ کٞرئی امودا موں علاقاٞ مئی ہسپتال کوم جانش پا نہ۔ ڈاکٹران نہ آشنش۔ مشران ارو کھنہ خلکہ شیدل ݭجنش یا طبی آشینش تسیں کیر کھنیں بوٹی استعمال کٞرنش تے جگ جوڑ ہوانش۔ کسیں شول یاݭیش دھوپ تے ہیس تلنش جوڑ ہوانش۔ مٹو ہاٞر علاقا مئی ہسپتال تھو۔ کتیک ہسپتال تھو تاٞس ما سیوا مریضاٞن تھو۔

مٹو ماکہ پکار اوں ماں تانی تتھیں رواج دوبارہ شروع کٞری۔ پالے سبزی بوئی۔ اوٹلوناں خوراک ماں اپان دور سیتی، وردش کٞری۔ ہفتا مئی اچھاٹ بانالاں یا کشکاں کھن رہ چٞکر داگ پکار۔ مہ کتیک تانی خوراکاں خیال ساتو تے وردش سیوا کیر تتیک مرض ختم ہوگ۔

الیاس جان

الیاس جان آں تعلق کالام تھی تھُو۔ ائی زوان صحافی تے سماجی کارکن تھُو۔ گاؤری رسالیں کیر چُنڑاں۔
الیاس جان

کمنٹس

آپ کی رائے

Check Also

مُوں اتروڑیں خوشال خلک، چُنڑیل: محسن الملک گلبرگ اتروڑ

مُوں اتروڑیں خلک باٞر نایٔلاج خو باٞر خوشال۔ اوم سُواٞ زمیداٞراٞن، اسوں گاۤٞن روزگار زمیدیری …

Fikr bildirish

E-pochta manzilingiz chop etilmaydi. Majburiy ma'lumotlar * bilan belgilangan