Home / مضمون / لِنڈور شازدہ

لِنڈور شازدہ

افغانستاناں خار بلخ ماٞکہ اٞ گٞھنیر آش۔ تساں اٞ لِنڈور پو آش۔ سہ عجیبہ حرکتونہ کٞرنش۔ لِنڈور آش پرہ اپانکہ شازٞدہ منش۔ لِنڈور تتھی بھاگاں پیال آش۔ سہ ساٞرہ داٞم کٞٹو چاروکہ زنگل شی بچنش۔ پتکہ نِماشامہ والنش۔ زنگل مئی علاقاٞں دی پیاٞل پا کٞٹو چاروکہ نیانش۔ پرہ لِنڈور سویاں گھاٞن آش۔ ان زنگل مئی اپانکہ تخت چاش۔ اپینہ تتھی تخت رہ بٞھینش تے دی پیاٞل ݭا ای کٞٹو چارانش۔ ائی منش اُوں یہ زنگلاں شازدہ تے اِیماٞ میں حکوماٞت تھی۔

دی پیاٞل اینچھلہ تن تانی وزیر کِیش۔

(۱)۔ کھاگاں وزیر:۔ ائی پاچاگاں کار کٞرنش

(۲):۔ بھاراں وزیر:۔ ائی سودہ تے دی بھاٞراں کار کٞرنش

(۳):۔ ساتوگاں وزیر:۔ ائی تخیں صفائی تے شازٞدیں خدماٞت کٞرنش

اینچھلہ حکوماٞت چلینش۔ اٞ دوس اٞ ناشنا ٹوخ ہُو۔ ساٞرہ داٞم اٞ کاٞکہ چیت ماٞکہ لال جوآریں ہار گی ہوا دہ روان آش۔ سہ کھیکی لِنڈوراٞں تخاٞں ردہ لنگوݭات تن تتھی ماٞکہ اٞ مراٞل مُوݭ لِیڄ تے تاٞس وا ٹوپ کیر۔ مُوݭ چیت ماٞکہ گِین پرہ ہار لِنڈوراں تخت رہ گیئے۔

کساٞتہ ساتوگاں وزیر تخیں صفائی کرنش تے تن اِیں ہار لِیڄ۔ تن لِنڈور کُوٹھارو۔ کاٞں ساٞتہ لِنڈور یائے تن ہار تاٞس کہ دِیت۔ داٞ ارو باٞچہ سلاٞمت ایں ہار تھکٞہ کٞن ڈالئی مئی دِیت۔ لِنڈورہ تتھی سِلیخ ہار لِیڄ تے حاران ہُو اُوں ایں ہار کٞن اِیماک چھوریت۔

لِنڈورہ سوچ کیر اوں ایں ہار راٞن طریقہ سہ استعمال کٞرجین۔ ساتوگاں وزیر گی یاٞ تاٞس کہ تتھی ہار دِیت ارو آٞس ایراناٞں باچاٞ کہ دہ منہ اِیں ہار شاٞزٞداٞ چھیں شازادگٞئی کہ ڈالئی مئی لاڑیت اٞر۔ ساتوگاں وزیرہ تاس گی چو باچاٞ کہ دِیت۔ تن شاٞزداٞں باراٞ مئی سوچ کیر اوں شازدہ باٞر مالدار ہوئے کِیک اوں اتیک گِران ہار ڈالئی مئی لاڑیت۔ باچاٞ لِنڈوراٞں وزیر کہ باٞر ڈالئی دِیت تے ایں منو اوں شازٞدیں کٞہ خِدماٞت آش تے یہ تیار تُھو۔

لِنڈورہ ایراناٞں باچیں سوآٞ ڈالئی عراقاٞں باچاٞ کہ لاڑیئے۔ اینچھلہ تاٞس سہ پا سکہ ویلی چیئے۔ کٞتیک دوسہ پت ایراناٞں تے عراقاٞں باچاٞ کہ سوال جواب کیر اوں مکٞہ فوج پکاٞر تھی۔ کِیکوں میں ریاسِت مئی ڈلہ ویلی ختم کرئی تہ۔ لِنڈورہ سوآٞ فوج جمع کِیر۔ جمع کاٞ کابل رہ حملہ کِیر۔ باچاٞ اجانہ حملاں مقابلہ نہ کٞربائے۔ تن جار بائیلی۔ لِنڈور تخت رہ باٞݭ۔ مُوٹو سیچ کہ کابلاں باچہ ہُو۔ تخت رہ بٞیوگ ما پت ایراناں باچاٞ کٞہ خاط تلو اُوں شازدہ چھیں بِیرے سہ باوہ کٞرنت۔ باچہ باٞر خوشال ہُو اُوں شازدہ میں بِیرے سہ باوہ کٞرنت۔ تن تانی بِیرے شازداٞ کہ دِیت۔ شازادگئی بنگلاٞ شی شازداں انتظار کٞرینش۔ شازدہ دربار باس کاٞ بنگلاٞ شی شازادگٞئی کہ لنگو۔ مِمیداٞر لوؤ کوچور مئی آش۔ لیجہ تن تھوس وا کِیش۔ لِنڈورہ شازادگیاٞں مُوک تھی څاداٞر دُو کِیر۔ شازادگیاں پناٞر مُوک پشی تتھی چلاٞں ٹِیک دہ شازدیں نظیرہ کار چھورُو۔ تمام اوجود مئی رات لٞکہ کٞرنڑاٞں چھلہ پِشو۔ تسیں آٞئیں تھی اِیں جولاک نِیکس “تُو تہ جنتیں حُور تھی”۔

شازادگٞیہ ایں جولاگ بُوت تے شازداٞں مُوک شی چھٹائے۔ کھیکی اساں څپوت مُوک تے لِنڈور تھوس لِیݭ تے تساٞں ہِکورہ دھیمی گِیری۔ سہ وئی پالنگ رہ باہوش چھور ہی۔ لِنڈور شازادگٞئی کہ نیاٞر ہو ٹاکُوݭت۔ شازادگٞئی، شازادگٞئی، شازادگٞئی۔۔۔۔۔۔۔۔۔۔

لِنڈوریں ییہ لِنڈوریں آٞئیں تھی کہ شازادگیاٞں نام بُود تے تُھوکو شاٞن کہ نیاٞر ہی۔ نیاٞر ہو لِنڈوریں رین اٞ څپینڑیں چھاٹ داٞ تاٞس کہ ارو “اِتھی شازادگیاٞں پُوݪ”۔ بردید ہی تئی اِتھائے کٞٹو چاروکٞہ نہ نُوت۔ تئی لخہ آج دِگیراں سُون لِیݭت۔

 

 

gawri one

یہ پروفائلبطور ایڈمن رائیٹس استعمال ہوتا ہے۔ اس یوزر کے تمام ارٹریکلز سائٹ ایڈمن کے شائع شدہ آرٹیکلز ہے۔
gawri one

Latest posts by gawri one (see all)

کمنٹس

آپ کی رائے

Check Also

جندرئی آں اُچات کھن، چُنڑیل: محسن الملک ایڈوکیٹ

برِݭ مئی اٞجاٞنہ مُوں تھِلاں پروگرام ہُو۔ مٞہ ساٞراٞں ست باٞجاٞ رہ روان ہُو۔ ما …

Leave a Reply

Your email address will not be published. Required fields are marked *