Home / لاڑاگاٞل قصاٞ / قصہ اوران پو آں

قصہ اوران پو آں

چُنڑیل: گوہر رحمان شہو

ارو اۤ میش آش ار۔ سہ زِمیندیری کۤرنش۔ تساں اۤ پو آش۔ دی لوکوٹور نہ آش۔ اۤ دوس اِیں مِیش کھیر مئی کار کۤرنش۔ ائی تانی پو کہ ارو چو چئی اُکاۤل۔ تساں پو چو تانی یئی کہ ارو بوب مناں دُو بِیش مانوڛ تُھو اۤر۔ باۤر کہ چئی کراۤ اۤر۔ تسوں یئی دوئی بِیش مانوڛیں چئی برابر کاۤ گھی گیئے تے بِڛدمو تتھی مِیش تہ اپانسہ تھو۔ اتھاں پوآں سوں بوب اتھاۤں پو رہ باۤر میاۤن آش۔ تن آۤس کہ کۤئی نہ منو۔ دی دوسہ اِیں پو چو تانی یئی کہ ارو بوب منہ گائے حلال کراۤ اۤر۔ تسوں ییہ گائے حلال کیر۔ اِیں پواۤ تُوشی ماس گھی ڈاۤبو۔ ائی داۤ اۤ دھوبیاۤں لاۤرہ گا۔ دھوبیاۤں پوکہ ائی تتھی ماسیں پِھیٹ گۤڑی پشاڛت۔ سہ رِینگوڛت۔ دھوبی اِیں پو کہ ارو ماۤں پو کہ ماس دہ۔ سہ ارو موں بوبہ دُو مئیڛ حلال کاۤ خاۤر کِیت۔ دھوبی تے اساں پو لنگی گاۤ۔ اِیں پواۤ دھوبی ایں درئی گھی ڈاۤبو۔ ان درئی جُوکی تساۤں کھوٹ گھی اۤ بورئی وا تلو۔ تاۤس گھی گا۔ ائی پنہ چو دُوئی مِیشاۤل سہ ڈۤپو۔ تام سہ دُو گھور آش۔ تام آۤس کہ ارو تئی اِیں کۤناں گِھینت؟ ائی ارو دھوبیاۤں لاۤر کہ زاۤر تُھو چو اپانکہ گِھیاۤ۔ آم ارو مُوں گھور کہ ہُب کۤر۔ تام لنگی گاۤ۔ اۤن تتھی اۤ گھور گھی گا۔ ائی چو اۤ گۤھنیرہ تے اۤ بِیریہ ڈۤپو۔ تام نِینہ پار کہ لنگنش۔ ائی تتھی گھنیر کہ ارو دُو مانوڛ گھر راکہ بڑنت۔ اولہ اکیں بِیرے گھی چو پار کہ لنگام۔ گۤھنیر آۤس کہ ارو گھی چو۔ اۤن تتھی بِیرے گھور راۤکہ بھیا گھی گا۔ گۤھنیرہ اولہ آۤس ما تپوس کِیش ارو چھاں نام کۤناں؟ ائی ارو ماں نام جاماڷ۔ ان تتھی بِیرے گھی گا تے گھنیرہ ای چِکاۤر دِیت۔ خلق یاۤ آۤس کہ ارو کہ چھاۤل تُھو؟ ائی ارو میں بِیرے نی۔ خلق ارو کۤن نی؟ ارو جاماڷہ نی۔ خلق ارو جاماڷہ نِیت تے تُو کا چِکاۤر دِئینت۔

ائی پنہ روان آش۔ پنہ چو تتھی ماک اۤ باچہ لار چانش۔ ائی باچاۤ کہ ارو یہ پا کار کۤرنش پرہ چھاۤں مزدوراۤن پِھیڛ گۤڑی ماں اِیں زاۤر سُوآۤ چھی کۤراۤں۔  باچہ ارو تُو آۤس ناۤم۔ ائی چھی ہُو تے یہ تھکہ اۤ بورئی زاۤر دۤم۔ اۤن اتوشی کار کاۤ ارو چھاۤں مزدوراۤنہ پِھیڛ گۤڑی ماں زاۤر سوآۤ چھی کِیر۔ سہ ای کھوٹ آش۔ باچاۤ آۤس کہ زریں اۤ بورئی دِیت۔ ان تتھی بوجئی زریں گھی گا۔ ائی چو زنگِل مئی دُوئی گۤھنیر اِساۤل سہ میلاؤ ہُو۔ تام آۤس کہ ارو ائی کۤناں؟ ارو تانی لار جِیکی کھوٹ گھی چو باچاۤ کہ دہ۔ سہ تھاکہ زاۤر دئی۔ تامہ تانی لار جِیکی کھوٹ گھی چو باچاۤ کہ دِیت۔ باچاۤ تسوں داۤ تام گۤڑی تلی۔ اِیں پواۤ زریں بوجئی گھی چو تانی بوب کہ دِیت۔

gawri one

یہ پروفائلبطور ایڈمن رائیٹس استعمال ہوتا ہے۔ اس یوزر کے تمام ارٹریکلز سائٹ ایڈمن کے شائع شدہ آرٹیکلز ہے۔
gawri one

Latest posts by gawri one (see all)

کمنٹس

آپ کی رائے

Leave a Reply

Your email address will not be published. Required fields are marked *