Home / مضمون / کالاۤمہ تعلیمیں حال

کالاۤمہ تعلیمیں حال

چُنڑیل: ماسٹر عبدالغفار، شہو کالام

لوکوٹور سکول تھی یاٞ بستہ اِشپاٞرن۔ سارہ کِشکاں کِٹ تھی بستہ گٞڑی اٞن ھسہ تے ملاٞں لٹور کوچور ݭا سکول پٞھر بٞچنت۔ لیکن سبقیں کہ ٹوپ تی ݭیݭئی معلوم نہ وانتھ۔ ییو بوب تپوس آٞمو نہ کٞرنت کو تٞھہ سکولہ کیں سباٞق منی۔ تعلیم باٞر آٞمو ران شئی۔ تعلیم حاصل کٞروگیں مطلاٞب اِیں نہ اُوں تھہ تانی بچیاٞن سکول پٞھر یا جمیت پٞھر لاڑا باٞغاٞم بھیاٞ تہ۔ ماکہ پکاٞر اُوں مٞہ سکول پھر چو استازاٞن سہ میلاؤ ہوئے۔ استازاٞن سہ رابطہ سیتی۔ استازاٞن ما تپوس کٞری اُوں مُوں لوکوٹور سکول پھر ین؟ نہ یٞن؟ سباٞق منن نہ منن؟

کون مُوں لوکوٹور سکول تھی یاٞئے تہ۔ گیل تے نماز ما پت تام ما سکولہ منیل سباٞق لنگا۔ یا زوتا پا۔ تام ما تپوس کراٞ اُوں تھٞہ آج سکولہ کیں سباٞق منیت۔ کہ چری تھہ سباٞق منیت تہ تام کہ مِیڄ کہ یعنی دی سباٞق مناٞ۔ لوفری کہ کھُوش گِرو کہ مُو چھوراٞ۔

ییو بوب سہ کئی احساس ہامو نات۔ پنجیم جمیتائے لوکوٹور تانی ناماں چُنڑوگ نہ جاٞناٞں۔ ییو بوب کہ پکاٞر اُوں تانی لوکوٹوررہ نظاٞر ساٞتی۔ لیکن مُوں کوستینی مئی کی فکر نات بارہ ہامو سادہ تے بگیشاٞل خلق تھو۔ سکول تھی لوکوٹور یاٞئے تہ تام ݭا ݪم کراٞں، کٞٹو چاراٞں۔ نمازیں تے سبقیں ݪاٹ نہ کٞراں۔ آٞک تہ حکوماٞت موں علاقاٞ کہ ہُوب آمو نہ کٞرینت۔ دی مُوں خلقیں اِیں حال تھی۔ کاٞس مئی ایں صلاحیت ناتھو تانی حقیں تپوس کٞرئی تہ۔ کہ ما مئی اِیں صلاحیت ہِیش تہ کمی موں حاق تُو نہ کٞر بانش۔ نہ ای مُوں اِیں حال ہوئینش۔ ماکہ پکاٞر اُوں مٞہ سوآٞ کوستینی اٞ مُوٹی ہو تئی تانی علاقیں ترقئیں کیر مِلی کوشش کٞری ہو مُوں وطاٞن ترقی کرئی۔

مُوں خلق ترقی کاٞ مِیڄ ہوئے۔ کہ چری مہ تانی لیݪ تے بلیم جانی تہ، تانی علاقاں مفاد جانو تہ، دی علاقاٞں چھلہ مُوں علاقہ پا ترقی کٞرئی۔ حکومتاٞں ہاٞرہ محکماٞ مئی مُوں علاقاں مانوڄ ہوئے۔ دی دی علاٞقاٞں ہاٞر کُوڅاٞ مئی نوم نوم داٞش داٞش افسراٞن ہُوآٞں۔ لیکن مُوں ثابت کالاٞم مئی اٞ افساٞر پا نات۔ ماکہ پکاٞر اُوں مٞہ تعلیمیں دِیش کہ توجہ دی۔

حضور (ص) آں حدیث شریف تُھو اوں ہاٞرہ مسلمان اِیسو مِیش رہ تعلیم حاصل کٞروگ فرض تُھو۔ تعلیم یافتہ مانوڄ تانی لیݪ تے بلیم جاناں، رین او لیݪ مئی تمیز کٞرباں۔ ماکہ پکاٞر اوں تانی لوکوٹور، لِکیٹیر ݭا تعلیم حاصل کٞرائے۔ لِکیٹیریں تعلیمیں دِیش کہ پا ہُوب کٞروگ پکاٞر۔ لِکیٹیراں پا مھا رہ حاق تُھو۔ ماں ما تسوں پا تپوس وینتھ۔ تعلیم یافتہ اسپوجا تانی اولادیں رین تربیت کٞربیں۔ اِینیں کیر اُوں معصوماٞناں زیات واسطہ اِسپوجاٞ سہ ہواں۔ کہ مہ تانی لِکیٹیر ݭا تعلیم حاصل کرائے تہ ان مئی مُوں آئیندہ نسلاں فائیدہ تُھو۔

ثابت کالاٞماٞں تحصیل مئی لِکیٹیراں صرف اٞ مڈل سکول تُھو۔ سوآٞ اُستیز بُھنائیں تھی۔ تام مُوں بچیاٞن کہ صحیح ہُوب پا نہ کٞرینت۔ استیز اکثر غیر حاضر وینتھ۔ ماٞ مئی اٞ دیر یاٞ تئی حاضری ماضری ݭا واپس بچینت۔ کومی تپیساں نات۔ کہ چری لِکیٹیریں تعلیمیں دِیش کہ توجہ دِیت تہ آئیندہ نسل مئی سوآٞ اُستیز موں تانی علاقیں ہوئے۔ کون موں علاقیں اُستیزاٞن ہی تہ تام موں بچیاٞن کہ رین ہُوب کرئی۔ تے رین تربیاٞت کرئی۔ کہ چری مہ تعلیم حاصل نہ کیر تہ مہ تانی حقیں تپوس نہ کٞرباٞں۔ تھاکہ تہ ران کہ معلوم تھو اوں حکوماٞت مُوں علاقاٞ کہ کئی ہُوب نہ کٞرینت۔ کئی ترقیاتی کار نہ کٞرینت۔ کوکونیل، بیوں، کارگلو آں لاٞم مئی پنج ݭو کاٞلہ مِیڄ حکومیتہ سکول چات۔ تم تھی سکول آجوک دوسائے بند تُھو۔ امی سکولونہ مئی استازاٞن نات۔ کوکونیل، بیوں تے کارگلوآٞں لاٞمہ لوکوٹور تانی لامہ سکول چھیری تئی دور دور دی دی سکولونہ پھر سبقیں کیر بچنت۔ تم تھی معصوماٞن رہ کٞتیک تکلیف لنگنت۔ معصوماٞن شیدلہ ڈک ڈک کٞمنت۔ ہِیم مئی پُورٞن دو دو ݪا ݪا کلومیٹر پیدل مزاٞل کاٞ سکول پٞھر بچنت۔

کہ ما مئی احساس ہُوش تہ مہ تانی حقیں تپوس کٞرباش تہ مہ بچہ یانیں تے مُو ای حال نہ وٞش۔ اِتھائی کِشکون امی سکولونہ کھولا ہُوش۔ آٞس ما علاوہ دی دی علاقاٞ مئی اکثاٞر سکولونہ بند تھو۔ ماکہ پکاٞر اُوں اٞ منظم تنظیم چائے۔ تنظیماٞں شکل مئی تانی علاقیں حقیں کیر منڈہ ترڑہ کٞری۔ کالاماں تحصیل مئی لِکیٹیراں دشیم جمیتاں سکول نات۔ اینیں کیر موں بچیان ݭوئیم ستیم ما پھر کہ یا مِیڄ کہ سکول نہ من بانت۔ موں علاقاٞ مئی لِکیٹیراں ہائی سکول ہوش تہ مُوں اِشپوؤ تعلیم ما کا محروم دٞھرش۔

حکوماٞت موں علاقاٞ سہ دئیر ییاں سلوک کٞرینت۔ اٞ حکومیتہ پا موں علاقیں دِیش کہ توجہ نہ دیتھ۔ کٞنی اٞ ٹاٞر پا مُو دِیش کہ نہ دِیت۔ ہاٞرہ حکوماٞت پشاڑی کٞرینت۔ افسراٞن ماکہ لیݪ نظِر دہ بِیرن۔ مہ تام کہ انساناں بچئی پا اخکارہ نہ وانتھ۔

یاٞ اُوں مہ سوآٞ کوستینی اٞ مُوٹی ہوئے۔ آٞک دی سہ دی ضِد تے بغض چھیری۔ تانی تے تانی علاقاں مفادیں کیر اٞ مُوٹی ہوئے۔ تعلیمیں دِیش کہ توجہ دی۔ کم ہامو علاقیں ترقئیں دِیش کہ توجہ کٞروݭات تہ ماکہ پکاٞر اُوں تسیں تانی دسائی مداٞد کٞری۔ ہارہ قسماں تعاون کٞری۔

مو خلقیں تتھی زوڑ قوات تے زور ختم ہیت۔ مِڄوک مزہ نات۔ ہاٞرہ مانوڄ ملیک تے مشر تُھو۔ اٞکدیاٞں جولاٞک کہ کن نہ تھاٞن۔ ہاٞرہ مانوݭیں اِیں کوشش تھی اُوں یہ ملیک تے مشر ہوش تہ۔ مکہ کٞن ملیک منوش تہ۔ ہارہ دوس جرگاٞ وانتھ۔ دوس دوساں جرگاں باوجود اٞ مسلہ پا اِیتھائی حل نہ ہُوت۔ دوساں بِیش جرگا وانتھ۔ لیکن کئی فائیدہ نہ نِکانت۔

مِیڄ موں خلقاں باٞر گاٞن رعب تے دبدبہ وانش۔ بُنائیں خلق ما ما بِئینش۔ بلکہ حکوماٞت پا ما ما بِھئینش۔ اینیں کیر اُوں مُوں اتفاق آش۔ مِیڄ جرگاٞ مئی مشراٞنہ کہ فیصلہ کِیش تہ سوآٞ خلق تتھی فیصلہ رہ متفق وانش۔ آجکل ہاٞرہ شیٹ مئی داش داش بیش بیش مشران تھو۔ ہاراٞک آک دی ما مِیڄ ہوگیں کوشش یا ڈمین مئی تھو۔ مہ مشر کہ مشر نہ منن۔ ایں وجاٞ تھی مہ دوس پہ دوس تباہئیں دیش کہ روان تھو۔ با اتفیقیاں وجاٞ تھی موں نام و نشان ڄھار ہوگ رہ تُھو۔ آجکل موں کوستینی کم گاٞن خاٞرہ پا حساب نہ کٞرن۔ اینچھلاں وخت یئی اوں ما کہ کم کُچریں ایڄ دہ پا نہ بِیرئی۔ کالامیں دٞھرین پا مٞہ ݪئیری لٞس۔ ماکہ کئی ہاٞمو نہ دٞھروت۔ رین رین قیمتی قیمتی دھرین موں تھیر تھی نِیکیس۔ موں خلق موٹو باٞن دوآٞ کہ دھروت۔ مہ دیال ہوٹلہ تمتھی خلقیں پلیٹونہ دوآٞن تے میزونہ پاک کٞرنتھ۔

کہ مہ اپان نہ پویانو تہ اینچھلاں وٞخت یئی اوں ما ݭا کم باٞن پا نہ دُھوآں۔ نہ ای موں کم څوکیدیری کہ چھورئی۔ موں تتھی زیڑ بھید ڄھار ہِیت۔ ائی تسوں مرضی اوں ما سہ کھیول سلوک کٞرنش تہ۔ بنایاں خلقاں عام تاثر تے سوچ ایں تھو اوں مہ کوستینی جڑ، انیڑی تے شری خلق تھو۔ ائی حقیقاٞت پا۔ ان مئی کئی شاک نات۔ موں تعلیم ناتھ۔ مہ تانی لیݪ تے بلیم نہ جاٞنن۔ دوست او دشمن مئی فرق نہ کٞربنت۔

gawri one

یہ پروفائلبطور ایڈمن رائیٹس استعمال ہوتا ہے۔ اس یوزر کے تمام ارٹریکلز سائٹ ایڈمن کے شائع شدہ آرٹیکلز ہے۔
gawri one

Latest posts by gawri one (see all)

کمنٹس

آپ کی رائے

Check Also

جندرئی آں اُچات کھن، چُنڑیل: محسن الملک ایڈوکیٹ

برِݭ مئی اٞجاٞنہ مُوں تھِلاں پروگرام ہُو۔ مٞہ ساٞراٞں ست باٞجاٞ رہ روان ہُو۔ ما …

Leave a Reply

Your email address will not be published. Required fields are marked *